Aínda que a falta de tres xornadas non ten asegurada a súa presenza no play-off de ascenso á Liga Feminina, o Club Baloncesto Arxil traballa xa na posibilidade de ser o anfitrión da fase.
O club verde solicitou formalmente á Federación Española de Baloncesto organizar o play-off, aínda que non foi o único, pois Ensino e Bizkaia mostraron tamén o seu interese.
Precisamente o GDKO Bizkaia, líder do Grupo A da Liga Feminina 2, é o próximo rival do Arxil nun partido que pode ser decisivo para as aspiracións das pontevedresas.
O Centro Galego de Tecnificación Deportiva acollerá o choque o sábado ás 19:30 horas. Tras ese partido faltarán o desprazamento a Avilés e o partido ante o Universidad de Oviedo, dous equipos da zona baixa da clasificación.
Se logra rematar a liga regular entre os catro primeiros o Arxil afrontará un play-off en formato de liguiña que reunirá os oito mellores equipos da Liga Feminina 2, catro de cada grupo, en busca das dúas prazas que outorgan o dereito de ascenso.