A moeda que na semifinal fronte ao Cisne caeu de fronte para o Condes de Albarei Teucro, deu a volta e resultou cruz na final da Copa Galicia, que se adxudicou o Cangas cun gol de Nikola Potic a falta de tan só tres segundos para o final do tempo regulamentario.
Foi tamén a vinganza do conxunto que adestra Pillo, que desta maneira sácase a espiña da derrota sufrida a pasada tempada, cando o Teucro, entón contra prognóstico, levouse o título ao gañar en Crecente aos do Morrazo (30-32).
O Pavillón vigués das Travesas viviu un partido intenso, apaixonante e moi disputado, que puido gañar calquera. Alternativas no marcador, no que o Cangas levou a iniciativa de saída, chegando a dispoñer de catro goles de renda (7-11) aos 15 minutos de xogo.
Con todo o Condes de Albarei Teucro reaccionou e logrou chegar ao descanso con só un gol de desvantaxe (16-17).
Os comezos da segunda parte ofreceron a un Teucro máis inspirado, que lle deu a volta ao marcador, tomando vantaxe (27-26) a partir do minuto 45, vantaxe que mantería no seguinte parcial (27-26) no que non se movería o marcador.
Eses dez minutos finais foron vibrantes, entrando nos últimos cinco con igualada (29-29), que se mantería ata que na última posesión (32-32) e a só tres segundos do final, Nikola Potic, máximo goleador da final con sete tantos, conseguía o gol que daba o título aos de Cangas.