Un ano máis a proposta de composición de grupos na Segunda B levantou bochas nalgúns territorios, que se senten gravemente prexudicados.
Esta vez non é Galicia a comunidade peor parada, como en ocasións nas que se enfrontou case exclusivamente a rivais madrileños e canarios, pero a repartición motivou as queixas de varias federacións territoriais.
Neste aspecto a principal voz discordante chega desde Navarra, cuxos equipos están acostumados a xogar contra rivais de País Vasco ou A Rioxa e que agora quedaron encadrados no Grupo I xunto a galegos, asturianos, cántabros e castelán-leoneses.
Un dos rivais do Pontevedra, o Izarra, plantéxase mesmo renunciar á categoría "por non poder facer fronte aos gastos de desprazamento".
Así o asegurou nun comunicado, no que asegura sentirse "humillado, menosprezado e notablemente prexudicado" e confirma que consultará aos socios se deben retirarse da competición. Farano nunha asemblea convocada para este xoves 7 de xullo.
A situación non é nova, xa que hai un ano o propio Izarra e o Peña Sport ameazaron tamén con renunciar a competir tras ser encadrados, como nesta ocasión, no Grupo I.
"Navarra é a comunidade máis castigada por esta repartición dos grupos e o é por segundo ano consecutivo. É unha vergoña como se realiza esta composición e o peor é que o resto de clubs dean o visto e prace tan alegremente", sinalou no comunicado o presidente do Izarra, Alfonso Canela.
Tras a proposta da Comisión Mixta, é a Real Federación Española de Fútbol a que debe ratificar a composición da Segunda B. Farao, segundo o previsto, o próximo 15 xullo.