Proba de nivel ao bo inicio de liga do Poio Pescamar, que recibe este sábado no pavillón da Seca (18:30 horas) ao ata agora intratable líder da competición, o Móstoles FSF.
O cadro vermello, cuarto con dous triunfos e un empate nas tres primeiras xornadas, quere confirmar o paso á fronte dado esta campaña e consolidarse na zona nobre da táboa.
Marcio non debe preocuparse polas baixas e conta con todo o plantel dispoñible.
A convocatoria compóñena: Silvia, Sara, Charo, Jenny, Jessi, Suki, Patri Corral, Carolina, Jessy Lores, Ceci e Ale de Paz.
No seu segundo partido como local da tempada o club espera dar un novo impulso á campaña de abonados, podendo os afeccionados retirar os carnés no despacho de billetes do pavillón antes do encontro.