Todo está listo xa no Recinto Feiral de Pontevedra para vivir unha gran competición deportiva, o Campionato de España de Ximnasia Trampolín.
A cita, instalada no Recinto debido á necesidade de altura para as manobras dos participantes, contará con máis de 600 deportistas entre as diferentes categorías de base e absolutas nas modalidades de trampolín, dobre minitramp (DMT) e tumbling.
"Para facer o campionato tivemos que facer un esforzo importante", sinalou na presentación do evento a recentemente designada concelleira de Deportes, Anabel Gulías, acompañada do presidente do Club Treboada, Carmelo Vázquez, e unha representante da Federación Española de Ximnasia, Covadonga Menéndez.
Ese esforzo ten que ver coa loxística necesaria para poder acollelo, coa instalación de bancadas no Recinto Feiral así como a colocación de 4 camas elásticas, 2 dobre minitramp e unha pista de trampolín, ao que se suma na zona de quecemento.
En canto á actividade, este mércores 21 de xuño comezará cos adestramentos oficiais e as primeiras competicións de base, que continuarán o xoves.
Xa o venres estrearanse a deportistas elite, con finais individuais e de clubs durante o sábado e domingo e un prato forte, a modalidade olímpica de trampolín na que boa parte das miradas estarán fixadas nunha deportista local como gran favorita ao título, Melania Rodríguez.
En relación á presenza local, con deportistas que adestran en moitos casos no Centro Galego de Tecnificación Deportiva "estamos contentos pola cantidade de deportistas galegos na competición, con 60 na base e ata 74 no campinato de España absoluto", sinalou Gulías.