Despois de 10 días adestrando duro, a ritmo case de dobre sesión diaria, a Sociedad Deportiva Teucro marchou á praia.
O primeiro plantel azul gozou este mércores dunha xornada diferente, unha idea que vén poñendo en práctica nas últimas tempadas.
En concreto o equipo teucrista desprazouse ata o areal do Carreirón, na Illa de Arousa, para baixo o mando principalmente do preparador físico, Toño Puga, realizar unha sesión de prevención e resistencia aeróbica, con exercicios tanto dentro como fóra da auga.
Tras suar un pouco na area, o persoal gozou dunha comida á que tamén asistiu a directiva e contaba despois coa tarde libre.
Esta xornada chega cando aparece no horizonte o primeiro compromiso amigable do verán, este venres 10 de agosto no Porriño ante o Atlético Novás de División de Honra Prata. Tras esta cita os seguintes encontros de preparación disputaranse no Pavillón Municipal dos Deportes de Pontevedra, os días 14 e 18 de agosto ante o Ismai e o ABC Braga respectivamente.