A final da Copa Deputación de balonmán espera á Sociedad Deportiva Teucro, despois de que os azuis vencesen ao Academia Octavio na semifinal da competición (36-28).
Ao igual que en roldas anteriores Quique Domínguez aproveitou o partido, disputado no Pavillón Municipal dos Deportes de Pontevedra, para dar minutos a xogadores do filial e aos menos utilizados durante a tempada.
O choque tamén significou o regreso ás canchas de César Armán tras unha longa lesión, aínda que o extremo só saltou á pista para lanzar un penalti.
Do primeiro plantel xogaron, ademais de Armán, Iago Gómez, Marcos Dorado e Adrián Pumar e os xogadores que compaxinaron o primeiro equipo co filial de Primeira Autonómica, como Carlos Pombo, Iván Fernández e José Ameijeiras.
A final da Copa Deputación disputarase o próximo domingo 17 de maio ás 18:30 horas en Cangas ante do Frigoríficos do Morrazo, que eliminou na segunda semifinal sen problemas ao Atlético Novás (23-31).