Chegaban a priori como favoritos para conseguir o pase ao Preolímpico de mediados de maio en Hungría, tras unha destacada traxectoria internacional nos últimos anos. Polo menos facíano a ollos da maioría, pero eles sabían o difícil que o tiveron nos últimos meses.
Sergio Vallejo e Adrián Sieiro (Piragüismo Poio Pescamar) viron no Selectivo Nacional disputado a pasada semana en Trasona como se esfumaban todas as súas opcións de converterse en olímpicos en Tokyo o próximo verán, obxectivo ao que entregaran todo o seu esforzo e anos de preparación.
O seu segundo posto no C-2 1.000 metros, por detrás dos os andaluces Tano García e Pablo Martínez, pecháballes as portas.
Pese ao pau, Sieiro e Vallejo repuxéronse na última xornada do Selectivo para impoñerse no C-2 500 metros, proba que será olímpica en París 2024 e na que competirán no próximo Europeo. Non era o obxectivo principal, pero si unha recompensa a tanto esforzo.
"O problema que teño é que teño un virus, de Epstein- Barr, que é como unha mononucleosis", revelou tras a competición Vallejo, recoñecendo que "non estou ben para nada para competir. O problema é que no día a día adestro fatal, este ano de feito víao moi difícil todo".
Declaraciones de Sergio Vallejo y Adrián Sieiro (Poio) tras clasificarse para el Europeo en C2 500 pic.twitter.com/EIjD3toRGH
— PiragüismoEspaña (@RFEPiraguismo) April 23, 2021
Trátase dunha infección que non sempre se detecta, pero que provoca entre outros síntomas fatiga, dores musculares, de cabeza ou malestar xeral e que non conta cun tratamento rápido e efectivo que o combata. Sufrírono de feito outras deportistas de elite, como o ciclista Esteban Chaves, sendo similar ao que padeceu tamén a nadadora pontevedresa Bea Gómez.
"Estamos moi contentos do que logramos a pesar de que o realmente importante para nós que era para nós o C-2 1.000 metros despois dun ano duro non puido saír", explica pola súa banda o outro integrante do C-2, Adrián Sieiro, tras vencer no C-2 500. "Tivémonos que conformar con isto, que a partir de agora vai ser o olímpico e aí desenvolvémonos bastante ben".
Ademais coa súa vitoria entran no proceso selectivo para o C-4 500 que competirá no Mundial e "deberiamos estar aí metidos", reafirma o pontevedrés convencido de que todo o esforzo de ambos terá recompensa.