É unha medida "provisional" pero permitirá aos equipos do Waterpolo Galaico adestrar con normalidade ata final de tempada sen problemas de horario e espazo.
"Mientras no se solucione todo", explicou Javi de Sáa en relación ao conflito co Natación Galaico polo uso do Complexo Deportivo Rías do Sur, o club de waterpolo alugará directamente a Supera, concesionaria das instalacións, horas de piscina en Pontemuiños.
O acordo, que debe ser ratificado polos socios nunha asemblea convocada para este venres 8 de xaneiro, supón "un dinero importante" para as arcas do Waterpolo Galaico, polo que deberá buscar novos patrocinadores que lle axuden a soportar o incremento no seu orzamento anual.
CAMPIONATO GALEGO ALEVÍN NO CGTD
Deixando ao carón os problemas de adestramento, a actividade segue para o club pontevedrés, que organizará o vindeiro sábado 9 o Campionato Galego Alevín Mixto de Waterpolo I Torneo Viaqua en colaboración da Federación Galega de Natación.
Á competición, ademais de dous equipos do Galaico, acoden Marina Ferrol, RCN Vigo, CW Santiago, CN Coruña e Asociación Coruñesa de Waterpolo.
Disputarase a piscina do Centro Galego de Tecnificación Deportiva en horario de 10:45 a 14:00 e de 16:15 a 21:00 horas.