A segunda volta de competición na Primeira División Galega de waterpolo comezou igual que terminou a primeira para o Galaico Pontevedra, líder invicto da clasificación.
Os pontevedreses liquidaron con comodidade o seu primeiro partido do ano en Ourense, ante o Pabellón, ao que derrotaron por un contundente 7-24.
O primeiro cuarto evidenciou a superioridade do Galaico (3-8), e a pesar de baixar o ritmo no segundo parcial (2-3), os pupilos de Javi de Sáa sentenciaron con rapidez tras o descanso.
O Galaico segue primeiro da liga regular con 18 puntos, seguido do CN Coruña con 15, equipo ao que visitarán na próxima xornada.
En Ourense tamén se disputaron dous partidos máis de categorías base, con pleno de triunfos para os pontevedreses en idade infantil, gañando o equipo B (0-8) e o equipo A (0-9) do Galaico.