A Real Federación Española de Natación confiou ao Club Waterpolo Pontevedra a organización do Campionato de España Xuvenil de 2ª Categoría.
A cita, que se incluirá dentro das actividades do 20 aniversario da entidade, celebrarase na piscina da Escola Naval Militar de Marín entre o 27 e o 30 de xuño.
O Nacional de categoría xuvenil supoñerá a participación de 11 equipos procedentes de 9 comunidades autónomas (Canarias, País Vasco, Valencia, Baleares, Aragón, Andalucía, Madrid, Murcia e Galicia).
Este campionato, sinala o Waterpolo Pontevedra, é ademais un "estímulo e motivación" desde o punto de vista deportivo para os seus xogadores, que poderán competir nun torneo do máximo nivel en casa e arroupados pola afección local.
Desde a organización contan que entre deportistas, técnicos e familiares o Campionato de España Xuvenil atraerá un mínimo de 300 persoas durante preto dunha semana.