Aos poucos pero con paso firme o Medio Maratón de Pontevedra segue crecendo no número de participantes, unha tendencia que, todo apunta, repetirase na que será a súa edición XXI.
A proba atlética, peche do Circuíto de Carreiras Populares, supera xa o milleiro de inscritos a dúas semanas para a súa celebración.
Pechado o primeiro dos prazos habilitados pola organización experimentouse un incremento do 15% con respecto ao mesmo período do ano anterior, o que fai pensar en bater de novo o record de participación.
En 2015 foron 1.650 os deportistas inscritos, dos cales 1.521 tomaron a saída.
A inscrición manterase aberta ata o vindeiro martes 11 de outubro na páxina www.championchipnorte.com, cun prezo agora de 20 euros por atleta.
O XXI Medio Maratón de Pontevedra celebrarase o domingo 16 de outubro con saída ás 11:00 horas desde a ponte dos Tirantes e meta no Centro Galego de Tecnificación Deportiva.