Foi unha competición moi igualada nos postos baixos, que finalmente rematou coa Gimnástica no oitavo lugar.
A Copa do Rei de Atletismo celebrada en San Sebastián tivo como vencedor ao Fútbol Club Barcelona (91 puntos), seguido de Playas de Castellón (69), Simply-Scorpio (61), Marathon (61), Real Sociedad (53), Tenerife (47), Fent Camí (42) e Gimnástica (41puntos).
Os pontevedreses empezaron a competición gañando a primeira carreira, os 200 metros, grazas a Alberto Salcedo, pero no lado contrario Mario García viuse abocado á última posición en triplo salto.
Eduardo Gallardo foi sétimo nos 400 metros, ao igual que un lesionado Víctor Gallego en peso, Sergio García nos 1.500 e Manuel Molinos en altura.
Pola súa banda Julián Ortiz logrou a segunda vitoria parcial para a Gimnástica nos 60 valos, mentres Alberto Guerrero foi cuarto nos 800 metros e Santi Ferrer quinto en pértega.
Cun cuarto posto na súa serie do relevo 4x200 os pontevedreses pecharon a súa cuarta presenza na Copa do Rei, competición baixo teito que reúne os oito mellores clubs do ranking nacional.