Pontevedra converterase entre os días 10 e 12 de abril na capital mundial do taekwondo coa disputa do Open de España.
Ao estar catalogado como categoría G-1 moitas das estrelas mundiais deste deporte confirmaron o seu prensencia nunha lista de incritos que ascende a 1.721 deportistas de 49 países.
Entre eles competirán no Pavillón Municipal dos Deportes, na modalidade de combate, o campión olímpico en Londres 2012 Joel González (-63 quilos) e a subcampiona Brigitte Yagüe (-49 quilos).
Son dous dos nomes que destacan nun equipo español no que tamén se encontran os pontevedreses Xián Silva (Mace Sport) e Borja Ríos (Hebe), a caldense Lúa Piñeiro (Natural Sport) ou o vilagarcián Francisco Padín (Club Olimpic).
A competición de combate será a máis numerosa con 1.257 inscritos, entre os que se encontra un amplo equipo da Federación Galega de Taekwondo composto por 132 deportistas.
Pola súa banda a competición de técnica contará cunha participación máis discreta, de 464 taekwondistas.
O Open de España repartirá importantes puntos para o ranking mundial na carreira pola clasificación para os Xogos Olímpicos de Río 2016, cita na que só pode competir un deportista de cada país por peso.
Neste aspecto, segundo deu a coñecer a Federación Española de Taekwondo, Lúa Piñeiro encabeza en marzo o ranking nacional feminino de -67 quilos, o que nestes momentos supoñería tamén a clasificación para o Mundial de Rusia.