Dous deportistas pontevedreses, Pablo Dapena e Saleta Castro, proclamáronse este domingo campións galegos de tríatlon sen drafting. Ambos lograron este título tras os seus bos resultados no III Tríatlon Atlántico celebrado en Baiona.
O campionato galego disputouse sobre a distancia olímpica, 1.500 metros de natación, 40 quilómetros de bicicleta e 10 quilómetros de carreira a pé, con saída dende a praia de A Barbeira. Os deportistas non podían ir a roda doutro ciclista ou rodar en pelotón.
Na proba masculina, Pablo Dapena foi en cabeza dende o inicio, controlando á perfección a natación e a bicicleta. Así, no terceiro segmento puido relaxarse un pouco e aínda así chegou a meta cunha cómoda vantaxe. O seu tempo foi de 1:51:47.
Acompañárono no podio Alberto Castiñeira (Tríatlon Arteixo) e Ismael López (Tríatlon Vilagarcía).
Anneke Jenkings, triatleta de Nova Celandia que non optaba ao título galego, foi a dominadora da proba feminina. Foi a mellor en todos os segmentos e chegou a meta cun tempo de 2:02:53.
Por detrás, Saleta Castro saíu na terceira posición da auga, pero remontou na bicicleta para colocarse nunha cómoda segunda posición que xa non abandonou ata o final. Desta forma, Saleta logrou o título de campioa galega cun tempo de 2:07:05.
Con respecto ao campionato galego, Sonia Pariente (Tríatlon Rías Baixas) e Cristina Torres (Mar de Vigo) completaron o podio.