Hai uns días tivo que abandonar a competición na última Copa do Mundo do ano por molestias no pé, unhas molestias que volveron dificultar a carreira na Copa Asiática disputada este sábado en Hong Kong.
Pablo Dapena finalizou na cuarta posición na que foi a súa última proba oficial da tempada.
O triatleta pontevedrés realizou unha carreira notable, pero sufriu moito coa dor do seu pé no tramo final, perdendo a súa praza de podio nos últimos 400 metros.
Dapena finalizou en Hong Kong, nun evento disputado en distacia sprint, cun tempo de 58:03, a 11 segundos do estadounidense Jarrod Shoemaker. O gañador foi o israelí Ron Darmon (57:44).
Ao finalizar a proba Pablo Dapena sinalou a través de Twitter, en relación á súa lesión e antes de comezar o seu descanso, que foron "os últimos 2,5 quilómetros máis dolorosos da miña vida".