O Concello de Cerdedo-Cotobade celebrou este sábado un emotivo acto para descubrir a placa co novo nome do pavillón municipal de Carballedo, que desde agora pasa a denominarse Pavillón Xosé Luís Bouzas Ambroa 'O Rubio'.
A homenaxe recoñece a traxectoria e o profundo compromiso deste veciño, falecido en 2022, quen dedicou boa parte da súa vida ao fomento do deporte e os valores deportivos na comunidade local.
A cerimonia, presidida polo alcalde Jorge Cubela e a concelleira Galicia Aguete Dorrío, estivo marcada pola presenza de familiares -que descubriron a placa-, portavoces municipais e numerosos veciños e amigos, nun ambiente de especial emoción.
Interviñeron representantes do Loureiro Fútbol Sala, club ao que Bouzas dedicou anos de traballo, e a súa filla Fina Bouzas, que evocou a figura do seu pai como precursor e exemplo para xeracións de mozas da zona.
'O Rubio' tivo un papel decisivo na década dos 90 na posta en marcha do primeiro club de fútbol sala feminino da localidade, o Deportivo Loureiro FS.
Ademais formou parte da fundación do 'Forno de barro', que despois pasou a chamarse Tenorio Fútbol-Sala Feminino.
O recoñecemento xorde dun acordo unánime da Corporación Municipal, como agradecemento á achega de 'O Rubio' ao desenvolvemento do deporte no municipio e polo seu papel decisivo na posta en marcha de actividades e equipos que marcaron a historia deportiva e social local.
O alcalde Cubela remarcou no seu discurso que o xesto simboliza "o orgullo e a admiración institucional e veciñal cara a alguén que levou o nome de Cerdedo-Cotobade e do Loureiro con compromiso e paixón".
Durante o acto destacouse a xenerosidade, visión e entrega incansable de 'O Rubio', así como a súa capacidade para unir á comunidade local en torno ao deporte e transmitir valores fundamentais aos máis novos.
A presenza dos seus netos na inauguración da placa, entre aplausos dos asistentes, puxo o broche a un evento que deixa gravado para sempre o nome de Bouzas ao desenvolvemento do deporte e a convivencia e historia local.