O Balonmán Poio Artai competirá a próxima tempada en Primeira Nacional.
Tras rozar o ascenso na pista, quedando a un só gol do obxectivo polo seu empate no último partido, o conxunto laranxa confirmou nos despachos o seu salto á terceira categoría do balonmán nacional.
Fíxoo aceptando a oferta da Real Federación Española de Balonmán como mellor segundo clasificado de todos os sectores da fase de ascenso.
Será para o Poio Artai "un novo reto, ilusionante e esixente, para o que necesitaremos o apoio de toda a nosa xente", afirmou o club nas súas canles oficiais despois de confirmar o seu ascenso.
Ante esta nova situación do seu primeiro equipo masculino puxéronse xa ao choio "na procura de patrocinadores e colaboracións que fagan posible competir con garantías na terceira categoría do balonmán español".