O Poio Pescamar entóase para a Copa Galicia cunha vitoria en casa ante o Burela

O Poio Pescamar volveu á competición ligueira este sábado na Seca cunha vitoria por 3-1 ante o Reyco Burela, penúltimo clasificado con só oito puntos na súa marcadora. Chuli, Débora Lavrador e Rafa Pato fixeron os goles do conxunto conserveiro.

A pesar da gran distancia que hai entre ambos os equipos na clasificación, o primeiro gol do partido non chegou até o segundo tempo. O equipo de Luís López-Tulla puido irse ao descanso por diante no marcador, pero as intervencións de Ana Eliza mantiveron con vida ao equipo burelense.

Tres minutos despois da reanudación chegou o primeiro gol do partido nos pés de Chuli, que aproveitou o erro de Irene Suárez na saída de balón para facerse co esférico e, cun potente disparo, pór o 1-0 no marcador.

O cadro poiense abriu a lata con este tanto, pero o Burela sorprendeu apenas un minuto despois cun auténtico golazo da propia Irene, que remendó así o seu erro anterior. A xogadora do cadro burelense fíxose co balón no bordo da súa propia área e sorprendeu a todos os alí presentes cun golpeo de campo a campo que superou a unha incrédula Elena.

A pesar de que o tanto colleu desprevindo ao conxunto local, o Poio refíxose rapidamente para adiantarse de novo no minuto 26. Noelia Montoro filtrou un balón interior para Débora Lavrador, que logrou virar sobre si mesma e bater a Ana Eliza para pór o 2-1.

Buscou o gol da tranquilidade o cadro conserveiro e atopouno nos pés de Rafa Pato a dez minutos do final. A xogadora italo-brasileira sorprendeu á meta do Burela cun golpeo afastado que entrou pegado á cepa do poste para facer o 3-1.

O equipo de Luís López-Tulla xestionou á perfección os dous goles de vantaxe nun plácido final para sumar tres valiosos puntos na Seca. Este resultado asinta ao conxunto conserveiro nos postos de play-off a falta de oito xornadas para o final de liga.

A competición non para en Semana Santa e o Poio visitará ao AE Penya Esplugues o vindeiro sábado ás 16:00. Antes, o cadro conserveiro disputará a final da Copa Galicia o vindeiro xoves 2 de abril ante o FSF Castro.

Consulta a acta neste enlace.