O Poio Pescamar imponse na segunda metade a un bo Móstoles

O Poio Pescamar sumou un novo triunfo no seu feudo ao imporse por 3-1 a un Móstoles que continúa a seis puntos sobre o descenso cando só restan tres partidos por disputarse.

A pesar de que na primeira metade o dominio e as ocasións foron para as visitantes, a solidez defensiva de Sandra Buzón e o acerto das vermellas tras o descanso foron claves para a vitoria.

Arrincou o partido co Móstoles levando a iniciativa e xerando maior perigo en área local, obrigando á gardameta a empregarse a fondo para manter a súa portaría a cero.

Tras o descanso, o guion cambiou por completo e o Poio Pescamar comezou a atopar espazos entre a defensa madrileña.

Así, tras unha recuperación en campo propio, Candea enviou ao corazón da área onde Irene García, de primeiras, bateu á gardameta visitante. Un minuto despois, Chuli tivo nas súas botas o 2-0 ao gañarlle a partida a Celia, pero o seu disparo despexouno a porteira a córner.

Sandra Buzón continuou mostrando a súa seguridade baixo paus, interceptando os balóns longos do rival, mentres o Poio, envalentonado polo gol, asediaba a portaría contraria en busca do segundo.

A insistencia local tivo a súa recompensa no minuto 29 cunha boa saída desde atrás da gardameta conserveira, que puxo o balón na liña de fondo para que Èlia servise a Laura Uña na frontal da área e puxese o 2-0.

Restaban 5 minutos para a conclusión do partido e o Móstoles continuou na súa procura de recortar diferenzas apostando polo xogo de cinco. Con todo, un novo roubo de Èlia en área rival transformouse no 3-0, obra de Martita.

A pesar do novo gole, as madrileñas lograron maquillar o resultado grazas a unha boa circulación de balón que culminou cun pase de Inma para Celia, que anotou o 3-1 final.

Consulta a acta neste enlace