O Supercampionato de España de Rallys pasará un ano máis por Ponte Caldelas.
O municipio forma parte do 59ª Rally Rías Baixas, que deu a coñecer os seus tramos e horarios de competición dun evento automobilístico que se celebrará a primeira fin de semana do mes de xullo.
Vigo será un ano máis o epicentro do rally, pero os primeiros tramos cronometrados do Rally Rías Baixas 2026 terán lugar en Ponte Caldelas para xúbilo dos afeccionados locais ao motor.
Antes diso a rúa Policarpo Sanz será escenario da cerimonia oficial de saída ás 21.30 horas do xoves 2 de xullo, mentres que á primeira hora do venres día 3 terá lugar un shakedown ou tramo espectáculo que non contará para a clasificación final.
Os primeiros tempos válidos contaranse na dobre pasada aos dous tramos deseñados en Ponte Caldelas, previstos para a tarde do venres 3 de xullo.
O primeiro deles será Ponte Caldelas-Vilarchán, con 13,72 quilómetros de percorrido e pasadas que arrincarán ás 17.01 e ás 20.31 horas. Trátase dun treito que mantén a súa configuración con respecto a 2025.
O segundo pola súa banda si contará con novidades, entre a propia Ponte Caldeas e Anceu, con 8,16 quilómetros cronometrados (17.49 horas e 21.19 horas).
Durante a actividade nestes tramos, o Parque Empresarial da Reigosa contará cun punto de asistencia remota para os participantes.
O 59ª Rally Rías Baixas completarase o sábado 4 de xullo cos tramos Vigo-Nigrán, Gondomar-Porriño, Salceda-Ponteareas e O Castro-Vigo.