Ponte Caldelas converterase esta fin de semana na capital do motor da provincia de Pontevedra coa celebración dunha nova etapa do Campionato Galego de Montaña.
Na Subida a Ponte Caldelas tomarán a saída 83 pilotos, 11 deles locais, para percorrer un circuíto de 3,8 quilómetros de lonxitude pola zona de Rebordelo. A liña de saída estará na estrada autonómica PO-224 en sentido cara a Soutomaior. Daquela os pilotos seguirán pola PO-103. Trátase dun trazado que mestura curvas moi rápidas, con outras moi pechadas. Ademais incopora unha chicane, un elemento único neste campionato e a novidade deste ano é que o tramo conclúe nunha longa recta, en lugar de en curva como ocorreu na edición pasada.
O CEIP Cordo Boullosa será o espazo onde se farán as verificacións administrativas e técnicas dos competidores, que logo levarán os seus coches ao parque pechado da Alameda.
A proba comezará o sábado ás tres da tarde para a disputa das dúas primeiras mangas, mentres que a saída o domingo será ás nove da mañá para decidir os resultados das últimas dúas mangas
Desde o Concello lembran que se cortará o tráfico entre a rotonda de Pazos e a saída da estrada vella do Balneario. Ademais o cruzamento do Balneario será de dobre sentido para garantir a entrada á vila durante os días de competición. Tamén fan un chamamento á seguridade e piden ao público que se coloque en zonas habilitadas.