O Pontevedra agárrase ao empate ante o Guadalajara

Pontevedra Club de Fútbol e Guadalajara repartiron os puntos este domingo no Estadio Municipal de Pasarón, nun partido que, en palabras de Rubén Domínguez, "o equipo tiña que sacar polo civil ou polo criminal".

No verde, dous rivais directos pola permanencia usaron as súas armas para facerse coa vitoria, pero co paso dos minutos deu a sensación de que a ambos os dous lles valía co empate.

Cabe destacar que Rubén Domínguez tivo que facer números para poder cadrar aos seus xogadores sobre o terreo de xogo ante a falta de banco, chegando mesmo a pór a un home como Alain Ribeiro a xogar de central ou a Vidorreta de lateral dereito.

En canto ao partido, foi o Guadalajara o que comezou co control do balón, asediando durante o primeiros cinco minutos a portaría dun Edu Sousa que tiña que intervir ao catro minutos de xogo para evitar o gol rival.

A réplica dos granates non tardou en chegar tras unha longa combinación de todo o equipo, pero o último pase de Vidorreta non chegou a conectar con Tiago, que foi molestado por un defensor dentro da área e non puido rematar.

Fíxose entón coa posesión o conxunto lerezano, pero non lograba penetrar o muro de once homes dun Guadalajara que estaba cómodo defendendo e esperaba o seu momento para facer dano.

O que si puido facelo foi o Pontevedra a balón parado cando se alcanzou o minuto 24 de xogo. Yelko dispuxo dunha falta cerca da área e apuntou directamente á escuadra, pero o que puido ser un golazo evitouno o gardameta desviando a córner.

Tras esa ocasión, o Guadalajara retomou o control e pouco tardou en materializalo en forma de gol. Samu Mayo, desde campo propio, enviou un pase filtrado ás costas de Eimil, Julio Martínez controlou e centrou raso cara ao punto de penalti, onde apareceu só Diego Amigo para rematar de primeiras ao interior da portaría de Edu Sousa.

Co 0-1, o Pontevedra estaba obrigado a remar contracorriente e deu un paso adiante na busca do tanto dun empate que chegou ao fío do descanso. Miguel Cuesta desde liña de fondo colgou o esférico cara a Luisao, que rematou moi mal, un defensor meteu o pé para despexar e volveu desviar o balón á banda esquerda do Pontevedra, onde esta vez foi Resende o que recibiu e logrou sorprender o porteiro cun disparo raso co que puxo o 1-1.

Tras o paso polos vestiarios o primeiro en avisar foi o conxunto local, pero non o fixo até o minuto 54 cun centro de Miguel Cuesta que Tiago cabeceou moi desviado. A resposta do Guadalajara chegou cinco minutos desde un córner, pero o disparo de Toño Calvo tamén se foi fóra.

Montoro, pouco despois, tivo para o Pontevedra a ocasión máis clara do segundo tempo, pero o gardameta visitante interveu para evitar o segundo tanto granate.

Co paso dos minutos o ritmo foi decrecendo considerablemente e apenas se producían chegadas a ambas as portarías. Só Miguel Cuesta, no minuto 80, foi capaz de sacar un bo disparo desde a media lúa, pero marchou rozando o pau.

Entraba o enfrontamento na súa recta final e foi entón cando o conxunto lerezano empezouno a pasar realmente mal. Miki tívose que retirar lesionado e Rubén tivo que cambiar de posición habitual aos seus xogadores ante a falta de xente no banco.

O Guadalajara, desde a esquina, tratou de facer dano ao Pontevedra, pero o equipo fíxose forte en defensa e resistiu o empuxe rival para rascar un punto que sabe a pouco.

PONTEVEDRA CF (1): Edu Sousa, Victor Eimil (Alain Ribeiro, min. 61), Miki Bosch (Nico Conesa, min. 81), Yelko, Miguel Cuesta, Resende (Álex González, min. 72), Vidorreta, Luisao (Marcos Denia, min. 81), Compa, Montoro e Tiago.

CD GUADALAJARA (1): A. Zarco, Ablanque, Neskes (Mendes, min. 66), Toño Calvo (Borja Díaz, min. 72), D. Amigo, U. Eulate (Pablo Muñoz, min. 66), Tavares, Víctor, Cera, J. Martínez e Samu Mayo.

Goles: 0-1, Diego Amigo, min. 30. 1-1, Resende, min. 42.

Árbitro: Pol Areas (Cataluña), asistido en bandas por Guillem Batlle I e Sergio Doval. Amoestaron a Compa (45'), Miki Bosch (53') no Pontevedra e a Samu Mayo (44'), Toño Calvo (47'), Tavares (85') no Guadalajara

Incidencias: Partido da xornada 14 de liga no Grupo I de Primeira RFEF disputado no Estadio Municipal de Pasarón ante 2.224 espectadores.