O Pontevedra Club de Fútbol incorporou unha nova ferramenta para que os seus socios, accionistas e afeccionados que o desexen poidan coñecer un pouco mellor o funcionamento da entidade deportiva.
Trátase dun portal de transparencia co que dá cumprimento a unha das obrigacións ás que están suxeitas as sociedades anónimas deportivas (SAD) en España.
Desde hai unhas semanas este apartado pasou a estar localizable a primeira vista na páxina web do Pontevedra.
Esta ferramenta permite consultar con facilidade, por exemplo, as últimas contas aprobadas oficialmente pola Xunta Xeral de Accionistas, co estado económico do club a 30 de xuño de 2025.
Tal e como se explicou na última reunión dos accionistas, a entidade granate finalizou a tempada 24-25 cun superávit despois de impostos de 126.674 euros, o que permitiu reducir a débeda total do club até os 818.347,48 euros.
Tamén é posible acceder ao orzamento aprobado para a tempada 25-26 que acaba de finalizar, e que fixaba unha previsión de ingresos de 2.375.167,96 euros.
Ademais dáse a opción de consultar a auditoría anual á que debe someterse a SAD, así como os seus estatutos sociais e o organigrama do actual Consello de Administración.
Toda esta información deberá ser actualizada ao peche do actual exercicio (finaliza o 30 de xuño de 2026) unha vez se aproben as contas e outras cuestións por parte da Xunta de Accionistas do Pontevedra.