A volta ao traballo do Pontevedra Club de Fútbol co seu primeiro adestramento do novo curso trae consigo a lista de partidos que disputará o equipo de Rubén Domínguez ao longo da pretemporada.
O conxunto lerezano ten por diante dúas semanas de adestramentos antes da súa primeira proba sobre o verde.
Non será ante un rival menor, pois os de Rubén Domínguez visitarán o Campo de San Pedro en Villalonga o próximo 29 de xullo para medirse a un recentemente ascendido a Primeira Federación como é o Deportivo Fabril.
Apenas tres días despois, o 1 de agosto, a expedición granate viaxará até A Lomba para disputar o Trofeo San Roque ante outro recentemente ascendido, pero a Segunda Federación, como é o Arosa SC.
Hai que baixar unha categoría máis para o terceiro partido da pretemporada, que será no Novo Municipal o 8 de agosto ante o Estradense, equipo que disputou o play-off de ascenso en Terceira Federación.
O día 15 do mesmo mes chegará o quinto amigable ante un vello coñecido como é o Ourense CF, recentemente descendido á cuarta categoría. O escenario do encontro está aínda pendente de confirmación.
𝑷𝑹𝑬𝑻𝑬𝑴𝑷𝑨𝑫𝑨 𝟐𝟔/𝟐𝟕 | Xa roda o balón! Xa chegan os primeiros amigables desta tempada 🫡♥️@DeporCanteira @ArosaSCOficial @CD_Estradense @Ourense_CF @CoruxoFCoficial @BerganFC @Muxiacf #OndeOLerezFaiHistoria pic.twitter.com/JEpBfoJpbM
— Pontevedra CF 🦴 (@PontevedraCFSAD) July 15, 2026
Xa na recta final da pretemporada o conxunto granate repetirá un dos partidos de preparación do pasado curso visitando o Coruxo en O Vao. Será o día 19 de agosto.
E, por último, o equipo de Rubén Domínguez disputará un triangular o 23 de agosto co Bergantiños e o CF Muxía, equipo de Primeira Futgal. Será no campo da Arliña, na localidade de Muxía.
Estes son o sete encontros programados até a data que Rubén Domínguez ten por diante para lograr que o seu equipo afronte a primeira xornada de liga contra o Real Avilés nas mellores condicións posibles.
Engade Pontevedra Viva como fonte preferida de Google de balde
Mantente informado coas últimas noticias de actualidade.