O Pontevedra queda fóra do play-off con suspense a pesar de lograr un épico empate no desconto

Este sábado viviuse un deses días que se lembrarán na parroquia granate. Pasarón deu por perdido o play-off, volveu crer nel cunha épica remontada no tempo engadido, e caeu de novo na profunda desolación horas despois cunha resolución que arrebata aos lerezanos a posibilidade de xogar a fase de ascenso.

O once inicial de Rubén Domínguez para a batalla decisiva polo ascenso presentou poucas sorpresas máis aló da titularidade de xogadores como Facu ou Joao Resende. A portaría foi para Marqueta e Alain, Miki e Montoro formaron a liña de tres. Vidorreta ocupou o carril esquerdo e Alberto Gil o dereito. Yelko e Facu Ballardo actuaron no centro do campo con Joao e Diego Gómez nas bandas e Compa foi a referencia na punta de ataque.

Torceuse pronto o encontro despois de que Yelko perdese o sorteo de campo con Babín, pois o equipo asturiano golpeou aos dous minutos cun gol tan temperán como inesperado. Cayarga puxo un balón á área que Alain despexou de cabeza e Kevin Bautista, libre de marca, recolleu o rexeite para bater a Marqueta. 0-1 para os de Moreira, que sentou no banco no sitio do sancionado Rubén Domínguez.

O gol sentou como un xerro de auga fría ao equipo lerezano, que tratou de dar un paso á fronte para danar a un equipo de Lolo Escobar que deixou claro que trataría de parar o xogo todo o posible.

De feito, o xogo brusco do conxunto avilesino foi castigado no minuto 19 coa primeira amoestación do partido. Eze viu o cartón amarelo por unha dura entrada sobre Joao Resende.

Pouco máis ocorreu sobre o céspede de Pasarón nos 28 minutos previos á primeira pausa de hidratación do partido debido ás altas temperaturas. Esta especie de tempo morto serviu para facer pequenos reaxustes como o intercambio de banda entre Vidorreta e Alberto Gil.

Comezou a reactivarse o Pontevedra cun disparo de Alberto Gil que Campabadal desviou a saque de esquina. Pouco despois replicou o Real Avilés cun golpeo afastado de Kevin Bautista que se estrelou no traveseiro.

Cayarga avisou novamente nun contragolpe xa no tempo de desconto, pero o seu disparo desde dentro da área saíu desviado polo lateral da portaría de Marqueta. Chegou ao seu fin un mal primeiro tempo do Pontevedra, que necesitaba remontar o encontro na segunda metade.

⏱️ Min. 28 | 0-1 | Pausa para hidratación! #𝐆𝐑𝐀𝐍𝐀𝐓𝐄®️♥️#PontevedraCFRealAvilesInd #PrimeraFederacion | #VersusELearning pic.twitter.com/jCdZukAWTG

— Pontevedra CF 🦴 (PontevedraCFSAD) May 23, 2026

Álex Gonález foi a única novidade nas filas do conxunto granate para o segundo tempo. O capitán ocupou o carril esquerdo, Vidorreta pasou ao centro da zaga e Alain adiantou a súa posición a zonas máis ofensivas.

Nada funcionou este sábado. Santamaría colleu o balón en zona de tres cuartos, encarou a Montoro e bateu a Marqueta cun golpeo cruzado desde o frontal. 0-2 a falta de 40 minutos para o final.

Os de Rubén Domínguez necesitaban reaccionar canto antes para meterse de novo no partido e Luisao entrou ao campo xunto a Rubén López para tratar de achegar aire fresco ao equipo.

Aínda coa derrota, o resto de resultados da xornada acompañaron por momentos ao equipo da Boa Vila. Facer un gol era de vital importancia para lograr un hipotético empate.

Pero os minutos pasaban co Real Avilés moi ben plantado defensivamente e con menos tempo de xogo efectivo do que lle gustaría aos locais. A vinte minutos para o final, a derrota volvía deixar fóra do play-off ao equipo de Rubén Domínguez.

Luisao tentouno cun centro que se envenenó e Vido estivo a piques de rematar un balón franco no segundo pau. A pesar da insistencia, o Pontevedra non lograba atopar o premio do gol.

Entrou Isi Ros no tramo final para propiciar un boureo entre ambos os equipos que se saldou con dúas amoestacións e a expulsión de Osky no cadro avilesino.

Cando todo parecía perdido apareceu Alain Ribeiro, que rematou un centro de Diego Gómez para facer o 1-2 no minuto 93. Con doce minutos de engadido, ao granates valíalles un empate para meterse no play-off de ascenso.

O escenario púidose pór máis de face aínda coa segunda amarela a Isi Ros, pero o colexiado quitoulle o segundo cartón tras a revisión pedida por Lolo Escobar.

Cando todo parecía perdido sucedeu o que ninguén podería esperar. O Avilés botouse atras, os granates foron con todo, Luisao puxo un centro con veleno e Compa empuxouna con todo para desatar a tolemia en Pasarón.

O de Pontecesures fixo un gol para a historia ao lograr un empate (2-2) que parecía clasificar ao equipo de Rubén Domínguez ao play-off grazas aos empates de Barakaldo e Madrid Castilla.

Con todo, o desenlace foi outro. A pesar de que as bases de competición daban ao Pontevedra como quinto clasificado ao ser o mellor parado no triplo empate, o Xuíz Único de Competición recorreu ao regulamento da RFEF para dar ese premio ao Madrid Castela.

Unha gran tempada que chega ao seu fin da forma máis cruel e inesperada posible.

PONTEVEDRA CF (2): Marqueta, Miki Bosch (Álvaro Pérez, min. 69), Alain, Yelko, Facu (Rubén López, min. 58), Resende (Álex González, min. 46), Vidorreta, Alberto Gil (Luisao, min. 58), Diego Gómez, Compa e Montoro´(Víctor Eimil, min. 76).

REAL AVILÉS INDUSTRIAL (2): Álvaro Fernández, Babín, Kevin Bautista (Gete, min. 83), Santamaría (Uzkudun, min. 73), Cayarga (Isi Ros, min. 87), Eze, Adri Gómez, Quicala (Raúl Rubio, min. 83), Campabadal (Guzmán, min. 73), Carmona e Osky.

Goles: 0-1, Kevin Bautista, min. 2. 0-2, Santamaría, min. 48. 1-2, Alain, min. 93. 2-2, Compa, min, 90+10.

Árbitro: Rubén Ruipérez (Castela-A Mancha), auxiliado nas bandas por Julián Sánchez e Javier López, con David García como cuarto colexiado. Amoestou a Compa (31´), Vidorreta (79´) e Álex González (91´) por parte do Pontevedra CF e a Eze (19´), Carmona (60´), Adri Gómez (67´), Campabadal (72´) e Isi Ros (89´) no Real Avilés Industrial. Tamén expulsou ao xogador do Avilés Osky (92´).

Incidencias: Partido correspondente á xornada 38 do grupo I de Primeira RFEF disputado no Municipal de Pasarón diante de 7.582 espectadores.