14 de xullo. É a data na que, segundo confirmou o club, arrancará oficialmente a tempada 2025-2026 no Pontevedra CF. Será coa volta aos adestramentos.
Os xogadores están citados para esa data no estadio de Pasarón para verse as caras por primeira vez e comezar coas sesións preparatorias desta pretemporada.
Pero antes dese día, os integrantes do primeiro plantel granate tiñan outra cita ineludible: os tradicionais recoñecementos médicos.
Entre hoxe e mañá terán que acudir aos servizos médicos do Hospital Quirónsalud - Miguel Domínguez de Pontevedra para realizar estes 'recoñecementos' e comprobar o estado de forma no que chegan a esta pretemporada.
Un dos primeiros foi un das fichaxes deste ano, o central Miki Bosch. Así o reflicte o propio club coas fotografías que publicou a través de redes sociais.
Polo hospital pontevedrés deberán pasar os outros cinco xogadores que, por agora, integran o capítulo de altas: o centrocampista Alain Ribeiro, o porteiro Raúl Marqueta, os laterais Víctor Eimil e Adrián Expósito e o central Juan Ramón Gómez-Pimpollo López "Juanra".
A eles sumaranse os que continuarán un ano máis no club tras ser renovados: Edu Sousa, Brais Abelenda, Álex González, Miguel Cuesta e Yelko Pino.
O que se descoñece, polo menos por agora, é o calendario de partidos amistoso que o Pontevedra CF disputará ao longo das próximas semanas como preparación.
Os granates debutarán en Primeira RFEF, o 31 de agosto en Pasarón, ante o Cacereño.