As instalacións deportivas da Cidade Infantil Príncipe Felipe están de estrea. O centro, dependente da Deputación de Pontevedra, inaugurou este venres a renovación que se levou a campo no campo de fútbol, que se dotou de herba sintética de última xeración e de novos vestiarios. Todo iso foi estreado por máis dunha decena de equipos de base de Pontevedra e a súa comarca a través dunha serie de partidos amigables.
Segundo destacou o presidente da Deputación, Rafael Louzán, na implantación do céspede artificial investíronse uns 400.000 euros. Trátase dunha superficie "única", asegurou, xa que é "máis flexible e non carga os músculos dos deportistas". Ademais, outros 200.000 euros destináronse á construción de seis vestiarios e uns baños para o público, todos eles situados nun dos fondos do propio campo.
Xunto coas reformas que se realizaron na bancada, que se cubriu e onde se situaron 300 localidades, e o reforzo que se levou a cabo no peche perimetral do campo, Louzán destacou que Príncipe Felipe ofrecerá a Pontevedra as "mellores" instalacións deportivas da cidade para a práctica do fútbol, próximas ao centro urbano e con amplas zonas de aparcadoiro.
Tanto o presidente da Deputación coma o director de Príncipe Felipe, José Manuel Fernández, indicaron que a resposta dos clubs foi "fantástica" e foron moitos os que se dirixiron ao centro para utilizar estas instalacións. Ata o 30 de xuño serán usadas unicamente polo Pontevedra CF, o Sagrado Corazón, o Salcedo, o Bora e para partidos de veteranos, categoría que monopolizará o campo as tardes dos sábados.
De cara á próxima tempada farase unha nova repartición, xa que outros equipos interesados optaron por seguir xogando nos seus actuais campos, debido a cuestións federativas. "Desbordamos calquera previsión que tiñamos", sinalaron os responsables deste espazo.
Fronte a este esforzo investidor en infraestruturas deportivas en Pontevedra -Louzán recordou que todos os campos remodelados no municipio contaron con financiamento provincial-, o presidente da Deputación criticou a "herdanza cero" que deixa o Concello nesta materia, xa que lamentou que só se executara un campo de fútbol 7 na Xunqueira, o que non axuda, dixo, a solucionar o "déficit" de instalacións da cidade.