O novo proxecto deportivo do Club Cisne Balonmán segue a tomar forma, e faino coa confirmación dunha peza esencial.
Marcos Otero 'Quiños' renovou por unha tempada máis como responsable do banco cisneísta na División de Honra Prata.
Será o seu segundo curso como primeiro adestrador do equipo, tras asumir o cargo o pasado verán despois de anos como segundo preparador.
Ao seu lado seguirá Roi Gallego, que compaxinará o posto de segundo adestrador coa dirección do equipo xuvenil masculino.
Un movemento que "consolida o compromiso do club cun proxecto baseado no traballo, a estabilidade e a aposta polo talento local", sinala o Cisne.
"A dupla Quiños-Galego representa non só a confianza nun modelo deportivo propio, senón tamén a consolidación dun equipo técnico comprometido cos valores do club e co desenvolvemento integral de xogadores e xogadoras desde a base", asegura a entidade deportiva.
"Con esta renovación, o Club Cisne Balonmán dá continuidade a unha liña de traballo que combina competitividade, formación e sentimento de pertenza, alicerces fundamentais dunha filosofía que situou ao club como un referente no balonmán galego e nacional", engade o club pontevedrés.
A renovación de Quiños únese aos movementos confirmados no plantel, como a renovación de Iván Calvo e a fichaxe de Guilherme Linhares.