A Real Federación Española de Fútbol ten desde este luns novo presidente. Será o pontevedrés Rafael Louzán, que se impuxo ao valenciano Salvador Gomar.
Así o decidiron os 138 asembleístas que participaron no proceso electoral aberto polo ente federativo tras a inhabilitación por dous anos do seu anterior titular, Pedro Rocha.
O apoio a Louzán, que será o vixésimo sexto presidente da RFEF, foi abafador. Logrou 90 votos, mentres que o presidente da federación valenciana quedou con tan só 43 apoios.
Ademais, houbo catro votos en branco e un voto nulo.
O terceiro dos candidatos que chegou até este proceso, o estremeño Sergio Merchán, retirou a súa candidatura horas antes da votación.
A pesar da condena por prevaricación que pesa sobre o ata o de agora presidente da Federación Galega de Fútbol, que aínda que non é firme inclúe unha inhabilitación de sete anos para desempeñar cargo público, o fútbol español apoiouno para converterse no seu novo presidente.
O dirixente galego, que preside a territorial de Galicia desde 2014 e foi presidente da Deputación de Pontevedra, cumpriu os prognósticos que o sinalaban como favorito, tras ser apoiado pola maioría das federacións territoriais e presentar o maior número de avais con 51.
O Goberno, a través do presidente do Consello Superior de Deportes, José Manuel Rodríguez Uribes, mostrou a súa desconformidade coa súa candidatura, pero ao non ser firme aínda o ditame contra el puido presentarse ás eleccións federativas.
A decisión do Tribunal Supremo sobre o seu recurso está prevista para o próximo mes de febreiro e Louzán xa advertiu que estaba "moi tranquilo" e que tiña "unha fe cega na absolución" cando presentou o seu programa 'Unidos polo fútbol español'.
Tanto el como desde a súa contorna aseguran que esta inhabilitación se refire a cargos públicos e que a RFEF é unha entidade privada, pero iso choca coa nova orde ministerial e os estatutos federativos.