A liga de División de Honra chegou ao seu fin para o Bádminton Ravachol Pontevedra, e fíxoo cunha plácida despedida.
Coa súa permanencia na máxima categoría xa asegurada e sen opcións de coarse este curso na pelexa polo título, polo menos o club pontevedrés despediuse da competición con bo sabor de boca, vencendo na Estrada ao San Fernando Valencia (4-3).
O choque arrincaba cos dobres mixto, con Jacobo Fernández e Georgina Bland superando a Lorenzo Adell e Andrea Arrones, e a pesar de que Carmen Carro resentiuse dunha lesión nos dobres femininos xunto a Itziar Barcala, o Ravachol volveu tomar vantaxe grazas aos irmáns Gabriel e Jacobo Fernández
Xa nas roldas individuais Georgina Bland impúxose claramente a Ashwathi Pillai e o mozo Raúl Bergua sumou unha valiosa experiencia pero cedeu contra o visitante Simone Piccini.
Tamén perdeu o capitán Gabriel Fernández, que pelexou a pesar dunha torcedura de nocello pero acabou cedendo en catro mangas ante Manuel Calero.
Chegábase así con empate ao último duelo, no que Itziar Barcala aguantou a presión para terminar gañando en cinco disputados sets a Andrea Arrones e pondo o 4-3 definitivo no marcador.
"Conseguimos a permanencia sen ter que pasar polos play-offs, o que demostra que fixemos unha campaña moi sólida", explica o director deportivo do Ravachol, Jesús Pereiro.
"A pesar das lesións e as complicacións loxísticas, o equipo respondeu e podemos dicir con orgullo que somos un club consolidado en División de Honra. Agora toca traballar na planificación da próxima tempada, na que esperamos poder xogar todos os nosos partidos como locais na mesma sede e deixar atrás os problemas de desprazamento e montaxe que vimos arrastrando", afirmou o tamén adestrador do equipo sobre os problemas de instalacións que tiveron que superar ao longo da tempada.
Coa liga acabada, o Bádminton Pontevedra centra agora a súa atención nas competicións individuais como o Campionato Galego Absoluto ou o Campionato de España Absoluto.