Tras a derrota en Vigo o Teucro pensa xa no encontro do próximo sábado (20:00 horas) ante o Meridiano Antequera no Pavillón Municipal dos Deportes de Pontevedra.
Os azuis confían en recuperar efectivos para a cita, conscientes de que nas últimas xornadas as ausencias minguaron o seu rendemento.
Malia iso a confianza segue sendo máxima tras o segundo tropezo da tempada ao manter unha ampla marxe de seis puntos sobre o segundo clasificado.
A semana sen embargo comezou cun leve contratempo en forma dun proceso febril que afectou a Gonzalo Carró, se ben a súa participación o sábado non debería perigar.
Máis difícil terao David Chapela malia que evoluciona favorablemente e afronta a fase final de recuperación da lesión de nocello que o tivo afastado das pistas durante as últimas semanas.
Por outro lado está o caso de Carlos García, que confía en superar as molestias musculares que lle deixaron a última hora fóra da convocatoria o pasado fin de semana.