Valoración "moi positiva" por parte do técnico do Pontevedra, Rubén Domínguez, despois da vitoria do seu equipo no derbi contra o Ourense CF.
A pesar do triunfo, o adestrador recoñeceu que os últimos vinte minutos de partido "non creo que os xogaramos ben", deixando que o conxunto local se metera no partido. Con todo, destacou que "a partir do gol, o equipo competiu moi ben" e fixo méritos "para poder ampliar o resultado".
Domínguez mostrou a súa satisfacción porque con este triunfo o equipo "achégase moito ao obxectivo", sumando 7 puntos de 15 disputados. Un inicio que para el é "moi bo" tendo en conta a dificultade dos rivais aos que se enfrontaron ata agora.
Sobre o uso do VAR, afirmou que "é mellor quitalo, porque ao final é raro que se retracte" o árbitro e comentou que, na súa opinión, houbo decisións polémicas, como o segundo gol con penalti e expulsión, que "creo que foi fóra de xogo". Aínda así, engadiu que entende a situación dos árbitros xa que "lles ensinan tomas que igual eles non poden pitar ben".
Respecto ao segundo tempo, o adestrador valorou que "os primeiros 20-25 minutos estivemos ben, mesmo con opcións de poder facer o terceiro", pero sinalou un tramo entre o minuto 65 e o gol do Ourense que non foi positivo.
Sobre o adversario, dixo que é "un equipo agresivo, competitivo, que ten ADN de nunca dar nada por perdido" e lembrou xestas pasadas con eles. Tamén lamentou o estado do céspede do Couto, cualificándoo como "unha leira" que condiciona o xogo.
Finalmente, Rubén Domínguez falou con emoción sobre volver á súa casa e puxo en valor o esforzo de xogadores como Brais Abelenda e Alain Ribeiro, sinalando que "fixeron un esforzo increible" e que os cambios se fixeron "por precaución" para coidar os xogadores nun campo "difícil porque hai moito duelo e moita disputa".
O adestrador concluíu resaltando a competitividade do grupo e a importancia de manter a todos "enchufados", subliñando que "temos 14 que están a petar na porta para estar no once inicial" e que esa competencia interna fará "que cada semana sexa máis difícil para min".