O seu nome soou nas quinielas e opcións de moitos equipos durante o mercado invernal, pero terminou comprometéndose co Pontevedra Club de Fútbol.
Rubén López, centrocampista sillendense cedido polo Real Club Deportivo, tivo claro con todo que a súa primeira opción de saír da Coruña era recalar no club granate.
"A verdade que desde o primeiro momento que falo con Rubén, con Jacobo, é un sitio que me atrae. Ademais do proxecto deportivo, o adestrador tamén me asegurou a confianza", explicou o xogador na súa presentación este mércores no Estadio Municipal de Pasarón e tras completar a primeira sesión de traballo cos seus novos compañeiros.
"É o equipo da miña provincia, porque tamén queda moi cerca da casa. Quería vir aquí", sinalou ante os medios de comunicación.
Rubén asegura atopar á súa chegada "un vestiario moi san e un grupo incrible, e as instalacións moi ben, un club grande".
Esperábanlle nese vestiario caras coñecidas como Diego Gómez, Compa ou Brais Abelenda, que lle acompañarán nunha etapa na que espera a nivel persoal "tentar seguir crecendo como xogador e como persoa" e a nivel colectivo "poder axudar o equipo que o está a facer de forma incrible, e intentar quedar o máis arriba posible e lograr os obxectivos".
Afirma Rubén López que a súa posición predilecta sobre o céspede é "de seis ou de oito", pero pon a súa polivalencia a disposición do equipo e "do adestrador, para que poida decidir".
A súa estrea co Pontevedra Club de Fútbol podería xa producirse na próxima xornada de liga, coa visita do Real Madrid Castilla a Pasarón.