O automobilismo galego e pontevedrés perde, polo menos por un ano, unha das súas probas máis carismáticas, a Subida a Escusa.
"Este ano non se vai facer", confirmou a PontevedraViva a presidenta da Escudería Buxa Motor Poio, Noemí Blas, tras renunciar a ser incluída no calendario da Federación Galega de Automobilismo para 2026 aprobado en asemblea o pasado sábado 13 de decembro.
"Ás veces hai que botar o freo e no futuro xa se verá", explica a máxima responsable da escuadra organizadora dunha Subida que en 2025 cumpriu 25 edicións e que cada ano congregaba a miles de afeccionados ao motor.
Asegura a presidenta sen querer profundar que existen "varios motivos" para tomar a decisión, e non quere pechar a porta a poder recuperar o evento no futuro.
"Veremos para o ano", afirma con tristeza por ter que tomar esta drástica medida.
Porque se trata, polo menos de face a 2026, de algo irreversible "porque non pagamos xa os dereitos de calendario".
Ponse fin desta maneira a unha proba non só das máis queridas no automobilismo galego, senón que chegou a ser parte do calendario nacional como Copa de España.
O CONCELLO MANTÉN O SEU APOIO Á SUBIDA A ESCUSA
Coñecida a decisión da Escudería Buxa Motor, desde o Concello de Poio o seu alcalde, Ángel Moldes, quizo mandar unha mesaxe de apoio aos organizadores da Subida a Escusa.
"Comprendemos as razóns polas que a escudaría Buxa Motor decidiu facer este ano unha pausa na organización da proba, despois de 25 anos a pé de canón", afirma o rexedor confirmando que "seguirán contando con todo o apoio institucional por parte do Concello para cando a entidade decida retomar unha das citas máis emblemáticas do automobilismo galego".