A adaptación de Lydia Pérez á pesada de -57 kg en competición internacional progresa adecuadamente. Así o demostra a medalla de bronce que conquistou a pontevedresa esta fin de semana no Torneo Internacional Gran Premio de España celebrado en Madrid.
Esta competición desenvolveuse nun contexto de máxima esixencia tanto pola presenza de loitadores de ata 43 países distintos como polo feito de ser selectivo para os Xogos do Mediterráneo, unha cita na que estará a loitadora lerezana tras sacar o seu billete no mes de febreiro ao imporse noutro selectivo, a Copa da Raíña.
O primeiro emparellamento de Lydia foi nada menos que coa medallista mundial e olímpica Luisa Valverde Melendres. A pontevedresa non puido vencer a loitadora ecuatoriana, que acabou chegando á final do torneo sendo subcampioa da categoría.
Este feito permitiu a Lydia Pérez disputar a repesca para optar a unha medalla de bronce que logrou conquistar finalmente.
Para iso tivo que refacerse da derrota inicial e, posteriormente, vencer a norueguesa Iben Tippie Tijmons Lekhal e á estadounidense Sophia María Mirabella.
Este terceiro posto permite á loitadora da Boa Vila selar a súa presenza nos Xogos do Mediterrano e, á vez, coller experiencia en competición internacional dentro da categoría -57 kg, un peso no que Lydia espera competir nos Xogos Olímpicos de Los Ángeles 2028.
Tanto a pontevedresa como o resto de compañeiros da Selección Española e outros 40 equipos de diversos países seguen concentrados no CAR de Madrid para adestrar nas mellores condicións e preparar os seus próximos compromisos.
Entre as próximas citas destacan os inminentes Xogos do Mediterraneo que arrincarán o 21 de agosto en Taranto, Italia.
Engade Pontevedra Viva como fonte preferida de Google de balde
Mantente informado coas últimas noticias de actualidade.