Campioa do Mundo e agora, tamén, campioa da UEFA Women's Nations League.
Teresa Abelleira e a Selección Española lograron este mércores o segundo título oficial da súa carreira para a pontevedresa e da historia para o combinado nacional feminino, ao vencer a Francia (2-0) na final da liga de Nacións celebrada no estadio sevillano de La Cartuja.
Nunca gañara España ao combinado galo, pero a esta Selección non hai nada que se lle resista e segue derrubando barreiras, con 32.657 espectadores nas bancadas.
Esta vez estaba vestida de curto, aínda que no banco, Tere Abelleira, e é que ao contrario que na semifinal do pasado venres fronte a Países Baixos a pontevedresa entrou na lista oficial de 23 futbolistas para a final, recuperada da lesión que lle impediu participar con normalidade no inicio da concentración internacional.
A súa entrada na convocatoria, do mesmo xeito que a Alexia Putellas, permitiulle celebrar o título de España ao grande e con todos os dereitos de campioa, recibindo medalla oficial aínda que non gozase finalmente de minutos sobre o céspede.
No que respecta a a final, o equipo español impuxo o seu dominio nun traballado duelo que decidiu cos goles de Aitana e Mariona nos minutos 33 e 54 do partido respectivamente.
A Selección Española leva ademais desta xanela internacional a clasificación para os Xogos Olímpicos de París, próximo reto para as campioas do Mundo e, como non, para Teresa Abelleira.
Engade Pontevedra Viva como fonte preferida de Google de balde
Mantente informado coas últimas noticias de actualidade.