A Federación Galega de Piragüismo declarou a Tono Campos (Breogán do Grove) e Ana Varela (Kaiak Tudense) como mellores padexeiros autonómicos de 2014.
Estas distincións entregaranse o sábado na gala que o ente federativo celebrará no teatro do Colexio Calvo Sotelo da Coruña.
Campos destacou esta tempada no Campionato do Mundo de Piragüismo Maratón celebrado en Oklahoma, onde logrou colgarse o ouro na categoría de C-1 e subiu ao segundo chanzo do podio no C-2.
Ademais o padexeiro do Breogán realizou un gran papel no Nacional de Inverno en Sevilla, axudando ao seu equipo a concluír na quinta posición, e no Campionato de España de verán en Trasona, onde se impuxo no C-2 500, C-2 1.000 e o C-4 1.000.
Pola súa banda Ana Varela, ademais do seu bo papel nos campionatos nacionais, logrou un meritorio oitavo posto no Mundial de Augas Tranquilas celebrado en Moscú.
No resto de categorías destaca a mención á regata de kaiak de mar de Cambados como unha das mellores probas do ano, o premio á Deputación de Pontevedra como mellor patrocinador ou ao Kaiak Tudense como mellor club.
A gala do piragüismo galego servirá ademais para entregar os galardóns aos campións das diferentes ligas galegas e provinciais.