Novo logro desbloqueado na meteórica carreira de Jéssica Bouzas.
A tenista arousá, tras o seu gran papel en Montreal, estreábase no torneo WTA 1.000 de Cincinnati ante toda unha lenda do tenis, a veterana Venus Williams, gañadora de sete grand slams e campioa olímpica.
Era a primeira vez que se medía no circuíto coa estadounidense, de 45 anos, e superouna con autoridade cun dobre 6-4.
A pesar do sólido do resultado "non foi fácil para nada", recoñeceu Bouzas tras o partido en declaracións difundidas pola WTA.
"Ela é unha lenda, é un privilexio xogar contra ela. Para min é como un soño, nunca pensei que podía xogar con Venus Williams e son moi afortunada por iso", explicou.
Agora a Jéssica espéralle unha dura segunda rolda fronte á candiense Leylah Fernández, número 24 do mundo, e gañadora recentemente dun WTA 500 en Washington.
Consolidada xa no Top-40 do mundo, un triunfo contra a canadense colocaría á Vilagarcía en situación de volver marcar o seu mellor ranking mundial.
Todo iso co US Open, último grande do ano, no horizonte, un torneo no que defenderá a terceira rolda que alcanzou en 2024.