A pontevedresa Loreto Núñez conseguiu, por segundo ano, subir ao podio do Campionato de España de Seleccións Autonómicas celebrado en Murcia.
A xogadora do Club Voleibol Pontevedra colgou a medalla de bronce con Galicia no devandito campionato na categoría cadete, despois de que a Selección Galega derrotase no último partido a Baleares por 3 sets a 1.
Tras pasar como primeiras de grupo e gañar en cuartos Estremadura, perderon en semifinais ante Canarias.
Actualmente Loreto Núñez compite coas categorías cadete, xuvenil e senior de primeira autonómica da entidade pontevedresa.
Tamén competiu no Campionato de España outra xogadora do Voleibol Pontevedra. Foi Antía Pérez en categoría infantil, aínda que unha lesión impediulle render a gran nivel. Galicia terminou oitava na categoría infantil feminina.