O Pontevedra Club de Fútbol levou unha sorpresa ao comprobar a acta arbitral tras o encontro que lle enfrontou este domingo ao Unionistas de Salamanca e no que perderon por 1-0, quedando nunha situación moi comprometida na clasificación.
Foi un detalle relativo á expulsión de Xisco Campos no minuto 79 de xogo, por vermella directa, tras unha dura entrada sobre Acosta nun repregamento defensivo tras gozar dunha clara ocasión para empatar nun saque de esquina.
O central granate viu prematuramente o camiño aos vestiarios, pero un erro de forma podería deixarlle sen castigo, e é que o colexiado do encontro, o andaluz Alejandro Quintero González, atribuíu a xogada a un compañeiro que nin sequera estaba sobre o terreo de xogo, concretamente a Pol Bueso.
"No minuto 79 o xogador (5) Bueso Paradis, Pol foi expulsado polo seguinte motivo: Dar unha patada a un adversario cos tacos en forma de ferro, con uso de forza excesiva, estando o balón en xogo e na súa disputa", explica a acta arbitral.
A lóxica empuxa a pensar nunha rectificación por parte do Comité de Competición, pero o certo é que se abre a porta a un 'perdón' para Xisco, un home fixo nas aliñacións de Jesús Ramos e que sería unha baixa sensible para o próximo partido de liga fronte ao Celta B, toda unha final para o Pontevedra na que terá a necesidade de gañar para tentar engancharse á pelexa por entrar nos tres primeiros postos.
Será unha papeleta que deberá resolver a Xuíza Única de Competición.