A lesión muscular do xogador Víctor Eimil é máis grave do previsto e todo apunta a que perderá o que resta de tempada, incluída unha hipotética fase de ascenso.
Aínda que nun primeiro momento Rubén Domínguez falou de "unha roturita" e confiou en que puidese chegar ao último partido de liga, as sensacións non son boas e o período de baixa será finalmente maior.
Eimil lesionouse no adestramento do martes 28 de abril e, nun principio, estimouse que podería estar unhas tres semanas de baixa.
Con todo, a lesión é máis grave do que se esperaba e perderá con total seguridade os encontros fronte ao Bilbao Athletic en Pasarón, Tenerife a domicilio e Avilés en casa, ademais do posible play-off.