Tres finais quedan ao Pontevedra para poder xogar a fase de ascenso a Segunda División, e dentro do club son conscientes diso. "Estamos moi motivados e pensando na fin de semana", asegurou Diego Gómez, que recoñeceu que tanto o plantel como o corpo técnico están "moi ilusionados por ver que pasa o sábado" fronte ao Bilbao Athletic (16:15 horas).
Ante a polémica do partido contra o Racing de Ferrol, o xogador granate explicou que o vestiario afronta esta situación como un estímulo engadido. "Estamos o dobre de motivados. No canto de frustrarnos con estas cousas que nos están pasando, é un extra de motivación tanto para nós como para a afección. Iso non nos vai facer baixar os brazos nin de broma", subliñou.
No plano persoal, Gómez mostrouse satisfeito co seu momento actual aínda que considera que pode dar "un saltiño a nivel de números". Despois de abrir a súa conta goleadora en Guadalaxara, espera "celebrar moitos goles aquí, en Pasarón, agora que vén o importante".
O xogador ourensán tamén valorou a súa adaptación ás distintas posicións sobre o terreo de xogo e reiterou que está a disposición do adestrador para xogar onde o equipo o necesite. Explicou que o plan do partido pode condicionar a súa posición, pero insistiu en que, sexa en banda ou por dentro, o importante é "sumar e poder achegar".
Sobre o empate da pasada fin de semana, admitiu que acabou enfadado pola última ocasión desaproveitada, aínda que quixo deixar claro o seu compromiso co equipo en cada partido. "Sinto moito o que fago no día a día e nos partidos. Foi un erro pola miña banda. Ao final unha ocasión só a falla quen a ten, pero dou por seguro que vou tentar facelo dez veces máis ata que entre", afirmou.
O xogador granate pechou a súa comparecencia cunha mensaxe para a afección, á que animou a seguir apoiando o equipo neste tramo decisivo da tempada.
"Estou moi ilusionado porque os meus compañeiros poidan vivir a experiencia de estar no fútbol profesional e tamén polo corpo técnico. Penso que ninguén o merece máis que nós, sobre todo pola cidade. Pontevedra leva moito tempo sen estar no fútbol profesional, están a axudarnos e arroupando todas as fins de semana. Sería un soño poder estar en Segunda División", sinalou.
Ademais, destacou que o club "está a facer as cousas moi ben para que veña toda a xente posible" e convida os afeccionados do fútbol galego "a que veñan vernos, porque estamos nunha situación moi bonita que a principio de tempada pouca xente podíase imaxinar. Hai que aproveitar que estamos aí e vir a Pasarón a botar unha man animando".