Vitoria lóxica pero máis traballada do previsto do Pontevedra sobre un Marcón Atlético que opuxo as súas armas mostrando boas maneiras. Os granates cimentaron o resultado nunha primeira parte na que se mostraron superiores, contemporizando na segunda, na que apenas houbo ocasións de perigo.
Con dous estilos contrapostos, o Pontevedra levou a iniciativa nos primeiros 45 minutos. Os de Luisito alternaban o xogo en curto cos cambios de orientación e diagonais en longo, coas que intentaban superar a ordenada defensa dos propietarios do terreo, que buscaban a área contraria de forma máis vertical e directa, tratando de sorprender en velocidade.
Eses argumentos permitían maior posesión ao Pontevedra, pero non crear perigo, mentres o Marcón Atlético o intentaba con varios disparos afastados que non inquietaron a Lloves. Ata que na primeira chegada seria dos granates, Borjas é derrubado por Bolo cando se dispoñía a disparar. O claro penalti transformouno Kevin Presa, axustando o remate á cepa do poste.
O gol non afectou á formulación duns e outros, pero se deu maior seguridade ao Pontevedra, que encontraría o premio á súa maior posesión de balón de forma un tanto inesperada na recta final do primeiro tempo. En pouco máis dun minuto chegaban dous goles que sentenciaban o marcador, o segundo do partido nunha xogada desgraciada para a defensa local, cando Racha desvía en propia meta un centro sen aparente perigo, e o terceiro nun balón no que Borjas gaña as costas aos centrais, regatea con facilidade e tranquilidade a José para marcar porta baleira.
Luisito cambiaría case por completo o seu equipo ao inicio da segunda parte, deixando unicamente no campo a Bruno, que a falta de 15 minutos tamén sería substituído por Capi. O obxectivo era repartir minutos, pero o xogo resentiuse na mesma medida que algúns xogadores acusaron a carga física que a pretempada está a deixar nas súas pernas.
Desa lóxica falta de frescura aproveitouse o Marcón Atlético, cun once máis homoxéneo, para nivelar o xogo e mesmo recortar distancias a falta de 10 minutos cun gol de Valiñas, tras unha acción a balón parado e nunha segunda metade bastante máis eslamiada, na que houbo poucos achegamentos con perigo.
MARCÓN ATLÉTICO (1): José, Bolo, Steve, Marcos, Racha, Iago, Arturo, Juan, Teije, Cecilio e Berto. Tamén xogaron: Joaquín, Valiñas, Álvaro, Baptiste e Sapi.
PONTEVEDRA CF (3): Lloves; Miguel, Pablo, Bruno, Adrián; Kevin Presa, Álex; Miki, Tomás, Jacobo; e Borjas. Tamén xogaron: Edu, Rodri, Pablo Carnero, Ramón, Mouriño, Abraham, Pedro García, Campillo, Rubén, Santi e Capi.
Árbitro: Luis Lois Carro (Pontevedra), auxiliado nas bandas por Ismael González Caramés e Marcos Soliño Barros. Amoestou a Racha, polo Marcón Atlético, e a Miguel, Jacobo e Pablo Carnero, polo Pontevedra.
Goles: (0-1) Minuto 20: Kevin Presa, de penalti. (0-2) Minuto 38: Racha, en propia porta. (0-3) Minuto 39: Borjas. (1-3) Minuto 80: Valiñas.
Incidencias: Campo do Carrasco (Marcón). Uns 400 espectadores.