O Teucro logrou este domingo o seu segundo triunfo da tempada ao imporse ao Balonmán Ribeiro por 32-27.
Iniciou ben o partido o conxunto pontevedrés, que colleu unha lixeira vantaxe aos oito minutos tras aproveitar unha superioridade numérica tras a exclusión de Jacobo Soto.
Os de Ribadavia trataron de manter o pulso, pero fóronse desinchando a partir do minuto quince, cando o marcador mostraba un 9-7. Durante o seguintes sete minutos a escasa efectividade ofensiva por parte de ambos os conxuntos traduciuse nun pequeno parcial de 2-0 a favor do Teucro, que colocou o 11-7 aos 20 minutos.
Unha nova fochanca ofensiva custoulle aos locais estar sen anotar entre o minuto 19 e o 25, pero a defensa mantívose firme, concedendo só un tanto ao Ribeiro, o que lles permitiu seguir cunha vantaxe de tres tantos (11-8).
Tras recuperar o ritmo anotador, Andrés Pérez, Miguel Monteagudo e Ricardo González, este último con dous goles, ampliaron a distancia até o 15-8. Xusto antes do descanso, Pablo Gayoso colocou o 15-9 co que se chegou ao intermedio.
Na segunda parte, o dominio do Teucro continuou. Pintus e Rhuan inauguraron o marcador pondo o 17-9 e alcanzando a máxima renda do partido.
Aínda que o equipo de Ribadavia tentou reaccionar, o Teucro seguiu mantendo o seu acerto ofensivo, polo menos até os minutos finais do partido, nos que os visitantes apertaron e recortaron a diferenza até quedar a catro goles do empate que non foron suficientes para frear o triunfo do equipo lerezano, que levou o triunfo por 32-27.
Consulta as estatísticas neste enlace