Complicada situación a que está a vivir o Club Cisne Balonmano. O conxunto pontevedrés foi de máis a menos e volveu tropezar este domingo na pista do Balonmano Zaragoza (28-26), encadeando sete xornadas consecutivas sen coñecer a vitoria. O equipo aragonés, que chegaba á cita con tres puntos menos que os lerezanos, recorta distancias e colócase agora a tan só un do cadro branco.
O equipo dirixido por Quiños arrincou ben, cun inicio de partido prometedor que parecía marcar o camiño (2-5). Con todo, tras un sete metros fallado polo local Juan Martínez e o posterior tempo morto do seu técnico, o Zaragoza colleu aire e reenganchouse cun parcial de 3-1 (5-6).
A pesar das constantes exclusións en ambos os bandos, o conxunto pontevedrés mantivo a súa solidez e volveu tomar vantaxe. No minuto 20, o Cisne aproveitou a exclusión de Jorge Ortega para porse 7-10, e Xoán Fernández pechou a primeira metade cun tanto que estableceu o 10-12 ao descanso.
Despois do paso polos vestiarios, a situación complicouse para o equipo lerezano, que encaixou un parcial de 2-0 co que o Zaragoza igualou o encontro (12-12). Aínda que Manu Lorenzo devolveu momentaneamente a vantaxe ao Cisne (12-13), o equipo pronto veu abaixo e, en apenas uns minutos, Lanero, Iribar e Do Val voltearon o marcador (15-13), forzando a Quiños a pedir tempo morto.
A pesar do intento de reacción, os dous equipos encadearon máis de catro minutos sen anotar. Marcos Andrés rompeu a seca, elevando a renda local até o 16-13, a máxima do encontro.
Os pontevedreses lograron refacerse e, tirando de carácter, empataron o duelo no minuto 47 (19-19). Pero xusto entón, o Zaragoza volveu dar outro golpe sobre a mesa cun parcial de 3-0 (22-19, min. 53) que resultou definitivo.
O Cisne non logrou reducir a desvantaxe a pesar dos seus constantes intentos, mentres os locais souberon manexar o tramo final e alcanzaron o último minuto cunha renda de tres goles. Nese minuto final viviuse un intercambio frenético, con até seis tantos entre ambos os equipos, que deixaron o marcador definitivo en 28-26.
Este resultado supón un duro revés para o conxunto pontevedrés, que xa encadea sete xornadas sen gañar e ve como o Zaragoza lle pisa os talóns na táboa. A próxima semana, o Cisne terá a obrigación de gañar ao pechacancelas Alcobendas para non complicar máis a súa permanencia na División de Honra Prata.
Consulta as estatísticas neste enlace