O Hospital Provincial de Pontevedra e o Hospital do Salnés acolleron este martes sendos actos de toma de posesión coma persoal sanitario fixo do Servizo Galego de Saúde (Sergas) de 145 profesionais de Enfermaría na área sanitaria de Pontevedra-O Salnés.
Destes profesionais, 17 asinaron para prestar servizo asistencial no hospital público de Ande-Rubiáns e 128 nos centros do Complexo Hospitalario Universitario de Pontevedra.
Se ben o prazo de toma de posesión é dun mes, ao longo da mañá deste martes boa parte destes profesionais rubricaron a súa sinatura coma persoal fixo de Enfermaría en ambos distritos desta área de saúde.
O xerente da área sanitaria de Pontevedra-O Salnés, José Flores Arias, acompañado pola directora de Enfermaría, Concepción Abellás Álvarez, e a directora de Recursos Humanos, Mercedes Castro Seijas asistiron a estes actos.
Estes responsables sanitarios supervisaron as xestións que dan por rematado este proceso selectivo tras a publicación o luns, 5 de maio, no Diario Oficial de Galicia dos nomeamentos coma persoal estatutario fixo dos aspirantes que superaron o proceso selectivo de concurso-oposición para o ingreso na categoría de Enfermeiro.
Neste proceso selectivo resultaron definitivamente seleccionadas en toda Galicia 1.556 persoas, das cales 1.363 corresponderon á quenda de acceso libre, 104 á de promoción interna e 89 á quenda de discapacidade xeral.
As prazas non cubertas pola quenda de promoción interna acumuláronse á quenda libre, foron convocadas 332 prazas por esta quenda de acceso.
