Este sábado, ás 08.20 horas, saía a segunda rotación de militares da Brilat desde o aeroporto de Santiago de Compostela en dirección ao Líbano. Un dispositivo formado por 150 militares comandados polo xeneral Antonio Romero Losado, xefe da Brigada Multinacional "Líbano" XXX, era despedido polo xeneral de División Fernando García González-Valerio, xefe da División "Castillejos".
Desde novembro ata o mes de maio de 2019, esta dotación liderada por Antonio Romero farase cargo da brigada multinacional, formada por contixentes de Nepal, India, Indonesia, O Salvador, Brasil, Serbia e China, ademais dos representantes españois, a maioría procedentes da Brilat.
En total, a dotación estará integrada por 3.500 militares que tentarán vixiar o cesamento de hostilidades na zona. A misión débese á decisión do Consello de Seguridade de Nacións Unidas (ONU) en 2006 adoptada para controlar as tensións entre Líbano e Israel tras o ataque lanzado por Hezbolá.
Ademais, a dotación apoiará ás Forzas Armadas Libanesas no seu despregamento no sector e asistirá ao goberno do Líbano para que estableza a súa autoridade nesta contorna. Ao mesmo tempo, apoiarán á poboación civil e defenderana ante a posibilidade de que se produza algunha acción violenta.
A Birgada "Galicia VII" (Brilat) manterase despregada en dous puntos distintos, liderando as operacións en Líbano e en Mali, durante os próximos meses.