Sete de cada dez animais que entran no refuxio do Centro de Acollida e Protección de Animais (CAAN) de Armenteira, en Meis, acaban atopado unha nova familia. Fano, como media, en apenas oitenta días.
Pero a pesar destes bos datos, nas súas instalacións aínda hai 180 cans, dos cales 54 son cachorros, esperando que unha familia os adopte.
Así o destacou o presidente da Deputación de Pontevedra, Luís López, que visitou o centro este martes para anunciar un investimento de 20.000 euros para mellorar os seus quirófanos e reforzar o servizo de control de colonias felinas.
López destacou que o CAAN é unha "referencia en España" no coidado de animais abandonados, xa que sostivo que "non só os rescatamos senon que lles damos unha segunda oportunidade cunha familia".
Desde hai dous anos o centro, que estivera especializado en cans, avanzou no coidado de gatos. Así, desde entón, atenderon preto de 1.800 felinos.
A través desta liña de traballo, os responsables do CAAN encárganse de identificar, esterilizar, vacinar e desparasitar aos gatos que viven en colonias dos máis de corenta municipios adheridos a este servizo.
Co novo investimento aprobado polo executivo provincial, o centro poderá comprar material de quirófano, un equipo de análise de sangue ou unha nova mesa para cirurxías.
Entre 2025 e o tres primeiros meses de 2026, o CAAN xestionou a adopción de 620 cans. Durante ese mesmo período, recuperáronse máis de 1.300 animais e foron devoltos aos seus donos, ben no lugar onde foron atopados ou no refuxio, 650 cans.
Para fomentar aínda máis estas acollidas, a Deputación activará unha campaña cun enfoque novo, ao pór o foco nos beneficios que ofrece para as persoas convivir cun can, xa que favorece a actividade física, fomenta o contacto social e axuda nas doenzas de saúde mental.
