Con motivo do Día Internacional da Eliminación da Violencia contra a Muller, a Deputación de Pontevedra celebrou este luns un acto institucional no que renovou publicamente o seu compromiso coa igualdade plena entre mulleres e homes e coa erradicación de todas as formas de violencia machista.
A vicepresidenta provincial, Luisa Sánchez, foi a encargada de pronunciar o discurso central da xornada. Na súa intervención, lembrou que "a violencia contra as mulleres segue existindo e mentres exista, ningunha sociedade pode considerarse verdadeiramente libre e democrática". Sánchez subliñou a responsabilidade das institucións para actuar "con eficacia, sustentabilidade e sensibilidade cara ás vítimas", especialmente tras o recente asasinato machista ocorrido na provincia, un caso que cualificou como "un espello incómodo" que evidencia que "os mecanismos de protección seguen fallando".
A vicepresidenta alertou de que a violencia machista "muda, evoluciona e adopta novas formas, tamén dixitais", polo que instou a non permitir "lagoas nin baleiros" na resposta institucional. Lembrou que, máis aló das estatísticas, a violencia ten "nomes e apelidos" e forma parte da vida de moitas mulleres: "É raro atopar unha muller que non sufra algún tipo de violencia machista nalgún momento".
Sánchez destacou o papel de toda a sociedade na loita contra esta lacra, desde as administracións ata as familias, escolas e contornas cotiás. "A indiferenza non é neutralidade, senón complicidade", afirmou, sinalando que a violencia machista non é un problema privado senón "estrutural, social e político", que debe afrontarse con educación, igualdade real, recursos públicos sólidos e unha xustiza que protexa de forma efectiva.
Neste sentido, a Deputación de Pontevedra destacou o incremento do 7 % no orzamento destinado a políticas de igualdade, o reforzo dos programas de prevención e o apoio aos municipios rurais para garantir que ningunha muller quede sen atención por vivir lonxe. Así mesmo, a institución reiterou o seu compromiso de acompañar ás vítimas "con profesionalidade e humanidade" e de seguir traballando a igualdade de maneira transversal en todas as súas áreas.
Durante o acto tamén houbo espazo para o recoñecemento ás mulleres que rompen o silencio e dan o paso cara a unha vida libre de violencia. Sánchez dirixiu ademais unha mensaxe explícita aos homes, convidándoos a implicarse activamente como "aliados firmes" na construción dunha sociedade máis igualitaria, entendendo que "a igualdade non é unha ameaza, senón un progreso colectivo".
A vicepresidenta concluíu a súa intervención cunha mensaxe de esperanza e compromiso afirmando que "ningunha muller nace pensando que a súa vida vai ser unha loita. Pero se o é, que nunca sexa en soidade. Que atope institucións que a protexan, contornas que a sosteñan e un país que a respecte". Neste 25 de novembro, engadiu, a Deputación renova o seu compromiso de avanzar sen retrocesos. "Ningunha menos, ningún paso atrás", proclamou Luisa Sánchez.
A responsable de violencia de xénero da Unidade da Policía Adscrita en Pontevedra, María Jesús Pires Juncal, foi a encargada de ler o manifesto central neste acto organizado pola Deputación de Pontevedra.
Pires Juncal instou a "abrir os ollos ante a crúa realidade" da violencia machista, lembrando que a sociedade continúa sendo escenario de "manifestacións de discriminación e situacións de desigualdade" que sustentan este tipo de delitos. "A desigualdade e a violencia de xénero son as dúas caras da mesma moeda", afirmou, subliñando que as cifras de vítimas seguen sendo "arrepiantes".
A axente destacou que a violencia se agrava cando se exerce sobre os fillos das mulleres vítimas, co obxectivo de xerar "o maior dano posible". Tamén alertou sobre a situación daquelas mulleres que viven estes malos tratos en silencio "porque non poden, non se atreven ou teñen medo a denunciar", o que as deixa "totalmente vulnerables e desprotexidas".
Pires sinalou ao machismo como factor común en todos os delitos de violencia de xénero, aínda que hoxe adopte formas "máis sutís, invisibles e sibilinas". Entre elas mencionou a ciberviolencia, que afecta especialmente a adolescentes e menores, vítimas de acoso, ameazas e ataques á súa dignidade a través de medios dixitais.
A responsable policial defendeu a coeducación como ferramenta fundamental para romper o "binomio dominio–submisión" e avanzar cara a modelos educativos coherentes cos principios democráticos. Só así, afirmou, será posible unha sociedade "baseada na igualdade real e efectiva, onde as mulleres poidan vivir en liberdade, respecto e con capacidade de decisión", sen espazo para ningún tipo de violencia machista.
Pires Juncal chamou a "cambiar a mirada, a actitude e a conciencia" e a actuar sempre desde unha perspectiva de xénero para impulsar a transformación social necesaria. Recalcou que a violencia de xénero é un problema social con consecuencias devastadoras, que esixe a implicación de toda a cidadanía e a corresponsabilidade institucional.
Así mesmo, advertiu contra quen banalizan ou negan esta realidade, porque "beneficia ao abusador e converte en cómplice a quen cala". Concluíu cun chamamento a acompañar ás vítimas posto que "debemos transmitirlles que non están soas, que contan co noso apoio para recuperar a súa liberdade e reconstruír as súas vidas".
A axente insistiu na necesidade dun traballo "arduo, constante e exemplar" para avanzar e garantir que "as xeracións que veñen detrás teñan unha vida libre de violencias".
